उषा के.सी.को 'माकुरी' सार्वजनिक

उषा के.सी.को दोस्रो कृति मुक्तकसङ्ग्रह ’माकुरी’ सार्वजनिक भएको छ । साहित्यिक पत्रकार संघले  के.सी.को आफ्नै निवास खुमलटारमा आयोजना गरेको उक्त कृति लेखक के.सी.को आमाको जन्मदिनको अवसर पारेर सार्वजनिक गरिएको हो ।

नेपाल मुक्तक प्रतिष्ठानका अध्यक्ष रामकाजी कोनेको प्रमुख आतिथ्यमा आयोजित उक्त कार्यक्रममा कोनेले नेपाली मुक्तक क्षेत्रको विषयमा चर्चा गरे । कोनेले एक मुक्तकले एक महाकाव्य बोल्न सक्ने क्षमता राख्नुपर्ने  बताए । पत्रकार तथा साहित्यकार राजन कार्कीले ’माकुरी’ कृतिका मुक्तक बाचनगरि लेखक के.सी.को लेखन यात्राका लागि शुभकामना व्यक्त गरे ।  आमाको नाममा  कृति निकाल्नु हरेक आमाहरूका लागि सुखद कार्य भएको पनि कार्कीले बताए ।

कार्यक्रममा वरिष्ठ साहित्यकार प्रमोद प्रधानले के.सी.को दोस्रो मुक्तक मुक्तकसङ्ग्रह  निकै खारिएर आएको बताए । उनी साहित्य क्षेत्रमा जति मेहेनत गरिरहेकी छन् अन्य क्षेत्रमा समेत उतिकै मेहेनत गर्ने सर्जकका रूपमा आफूले नेपाल–भारत साहित्य महोत्सव आयोजना गर्दा नै थाहा पाएको बताए  । कृतिको बारे बोल्दै प्रधानले माकुरी कृतिमा आम आमाहरूको आवाजमात्र नभइ समाज र देश पनि उत्तिकै ससक्त रूपमा मुक्तकमा बुलन्द बनेर आएको बताए ।

कृतिको समिक्षा वरिष्ठ समालोचक डा. गोविन्दमान सिंह कार्कीले गरेका थिए । समालोचक कार्कीले माकुरी कृति भित्रका मुक्तकका विविध पक्ष केलाएका थिए भने कृति संग्रहणीय रहेको बताए । कार्यक्रममा डा. दामोदर पुडाशैनी किशोरले माकुरी मुक्तक कृति जस्ता थुप्रै आमाहरूका आवाज अबका साहित्यले बुलन्द गर्नुपर्ने बताए । स्रष्टा समाजका अध्यक्ष पवन आलोकले  लेखक के.सी.लाई तेस्रो कृति समेत आमाकै हातबाट लोकार्पण गर्ने अवशर मिलोस् भनि शुभकामना दिए । कार्यक्रममा मुक्तककार निशा के.सी र शान्ती शर्माले माकुरी कृतिका मुक्तकहरू वाचन गरेका थिए ।

रामजी घिमिरेका १०१ गजलहरु पढ्दा

नेपाली साहित्यको साधना र सिर्जनाको क्षेत्रमा आफ्नो जीवनका तीन दशक बिताइसकेका रामजी घिमिरेको रामजी घिमिरेका १०१ गजलहरु नामक गजल सङ्ग्रह २०७१ सालमा प्रकाशित भएको छ । यस गजल सङ्ग्रहभित्र उनीद्वारा लेखिएका १०१ वटा गजलहरु राखिएका छन् । यस कृतिभित्रको पहिलो गजलभित्र जुनी जुनी तिम्रो दिलमा बास देउ मलाई सँगै बाँच्न तिम्रै आधी सास देउ मलाई भनिएको छ। गजलमा कविताको आवाज उतार्न सक्नु पर्छ । गजलका सेरहरुमा मुक्तकीय प्रभाव दिन सक्नुपर्छ ।

कर्म खोटो भए पछि के को खुशी मिल्थ्यो हजुर बल्ल बल्ल जुराएको भेट्ने मिति स-यो कठै घिमिरेले गजलमा लेखेका छन् । गजल उत्कृष्ट र सुन्दर बन्नका लागि गजलको रुप पक्ष र भाव पक्ष दुबै सबल हुनु आवश्यक छ । रुप पक्षका दृष्टिले सङ्ग्रहभित्रका सबै गजलहरु सुसज्जित छन् । मानविय संवेदना, प्रेम, घात प्रतिघात, देशभक्ति र माटोप्रतिका प्रेम र प्रकृतिचित्रणका कोमल भावहरु उनका गजलभित्र भेटिन्छन् । गजलकार घिमिरे सफल गीतकार पनि  हुन् । आफूले भोगेको र देखेको समयलाई आफ्नो चेतना तथा अनुभवले महसुस गर्ने र त्यसको सजीव तस्बिर उतार्ने प्रयासको उपज हो यो गजलसङ्ग्रह। यसभित्रका गजलहरुले कही कतै कसैको मन छोयो भने त्यही नै पर्याप्त हुन्छ ।

बालापनको संगी साथी आज भेट हुँदा
नखोज्नुथ्यो त्यस्तो भाउ तिमीले भुल्यौ क्यारे ।

बन्धक राखि जेथो सबै सपना बोक्दै मुग्लान पसे कसरी म फर्कौ रित्तै साहुको कसम चुक्ने गरी  घिमिरेले गजलमा भनेका छन् । घिमिरेका गजल भने अधिकांश कोमल भावका नै छन् । यिनका गजलमा जिन्दगीका विवशता, उमङ्ग–उत्साह,

उपदेश पनि रहेका छन् । केही गजलले सूक्ष्य व्यङ्ग्य धारणा पनि गरेका छन् । गजलमा प्रशस्तै नीतिनियमहरु पालना गरेको  हुनुपर्छ । कस्तै वरिष्ठ भनाउँदाका गजलमा पनि संरचनात्मक गल्तीहरु भेटिन्छन् । गजल संरचनाका सूक्ष्मभन्दा सूक्ष्म कुराहरुसँग परिचित हुँदै साधनारत भइरहेमा हामी गजलकार घिमिरेबाट सशक्त गजलहरु निश्चित रुपमा प्राप्त गर्नेछौं । उनका गजलमा तिम्रो रुपको चर्चा चल्थ्यो गाउँबेसी जताततै पहिला जस्तो चर्चा अचेल किन किन पाउन छाड्यौ भन्ने कुरा समेत बोलेको छ । तिम्रो माया पाउनलाई तिम्रो दिलमा छाउनलाई नझुकेको शिर कतै धेरै पल्ट झुकाई सके घिमिरेले गजलमा लेखेका छन्।

कहाँ गएर माग्ने बास बस्ती बगे पछि
जताततै त्रासै त्रास बस्ती बगे पछि ।