नयाँ वर्ष २०८२ को सुअवसरमा कविता संसार अनलाइन मासिकले
मुक्तक विधामा समर्पित विशेषाङ्क लिएर उपस्थित हुन पाएकोमा हामी अत्यन्त हर्षित छौं । नेपाली साहित्यको बगैँचामा मुक्तक एक अनुपम फूल हो—सानो संरचनाभित्र विशाल अनुभूति समेट्ने । यस विशेष अङ्कमा हामीले नेपालका वरिष्ठ, स्थापित र नवप्रवेशी गरी जम्मा १३२ जना सर्जकहरूको मुक्तकलाई समेट्न पाउँदा यो अङ्क झनै समृद्ध, विविध र प्रभावशाली बनेको छ ।
वरिष्ठ सर्जकहरूबाट आएका मुक्तकहरू अनुभूतिको परिपक्वता र भाषाको सौन्दर्यले भरिएका छन् भने, नयाँ पुस्ताका सर्जकहरूका मुक्तकहरूमा नवीन प्रयोग, जीवनप्रतिको ताजगी र गहिरो आत्मबोध पाइन्छ । मुक्तकले कुनै पनि लेखकलाई भाव–संयोजनको अनुशासन सिकाउँछ र पाठकलाई सोचको नयाँ दिशा दिन्छ ।
यस विशेषाङ्कलाई सम्भव तुल्याउनुहुने सम्पूर्ण १३२ जना मुक्तककारहरूलाई हामी हार्दिक धन्यवाद ज्ञापन गर्दछौं । तपाईंहरूको शब्द–साधना, कलमको इमानदारी र सिर्जनशील योगदानले यो अङ्कको मूल्य बढाएको छ । समावेश भएका मुक्तकहरूको मूल्याङ्कन गर्ने जिम्मा पाठकहरूमा सुम्पेका छौँ ।
इच्छुक साहित्यप्रेमीहरूले हाम्रो यो साहित्यिक यात्रालाई निरन्तरता दिन र कविता संसारलाई अझ सशक्त बनाउन सक्दो आर्थिक सहयोग गर्नुहुनेछ भन्ने विश्वास लिएका छौं । तपाईंहरूको साथ र समर्थन नै हाम्रो प्रेरणा हो ।
मुक्तकप्रेमी पाठकहरूलाई यो विशेषाङ्क सन्देश, अनुभूति र सौन्दर्यको समागम बनोस् भन्ने हाम्रो शुभेच्छा छ । हामी भविष्यमा पनि यस्तै विधा–विशेष अङ्कहरूमार्फत् नेपाली साहित्यको विविधता उजागर गर्न प्रयत्नशील रहनेछौं । धन्यवाद !
अङ्क २१ पढ्न र डाउनलोड गर्नका लागि
No comments:
Post a Comment