आजको व्यस्त र तीव्र गतिमा बदलिँदै गएको जीवनशैलीमा पाठकसँग समय कम हुँदै गएको छ। तर कथा सुन्ने, अनुभूति साट्ने र जीवनका यथार्थसँग साक्षात्कार गर्ने मानवीय चाहना कहिल्यै कम भएको छैन । यही आवश्यकताले लघुकथालाई आजको समयको सबैभन्दा प्रभावकारी साहित्यिक विधामध्ये एक बनाएको छ। सानो आकारमा गहिरो भाव, तीक्ष्ण विचार र समाजको यथार्थ प्रस्तुत गर्न सक्ने क्षमता नै यसको विशेषता हो ।
डिजिटल युगले लघुकथालाई अझ व्यापक बनाएको छ । अनलाइन माध्यममार्फत एउटा कथा केही क्षणमै हजारौँ पाठकसम्म पुग्न सक्छ । यसले नयाँ सर्जकलाई अवसर दिएको छ भने पाठकलाई विविध विषय, शैली र अनुभवसँग जोड्ने काम पनि गरेको छ । यही यात्रामा ‘लघुकथा संसार’ ले सर्जक र पाठकबीचको सेतु बन्ने प्रयास गरिरहेको छ । यहाँ प्रकाशित प्रत्येक लघुकथा केवल शब्दहरूको संयोजन होइन, हाम्रो समाज, सम्बन्ध, सङ्घर्ष, आशा र परिवर्तनका प्रतिबिम्ब हुन् ।
हामी विश्वास गर्छौं— छोटो लघुकथाभित्र ठूलो संसार लुकेको हुन्छ । त्यस संसारमा मान्छेको हाँसो छ, आँसु छ, पीडा छ, प्रेम छ र भविष्यप्रतिको आशा पनि छ । ‘लघुकथा संसार’ अनलाइन मासिकले यिनै अनुभूतिहरूलाई पाठकमाझ पुर्याउने आफ्नो यात्रालाई निरन्तरता दिनेछ । सर्जकको सिर्जना र पाठकको साथले यो संसार अझ समृद्ध र अर्थपूर्ण बन्दै जानेछ भन्ने हाम्रो विश्वास छ ।
अङ्क ३६ पढ्न र डाउनलोड गर्नका लागि
जीवित राख्नका लागि तपाईंको
आर्थिक सहयोग महत्वपूर्ण हुन्छ ।
No comments:
Post a Comment